Bye bye May

في نهاية شهر مايو العزيز أحب أقوله ارحل بقى كفاية عليك كده أوي، بصراحة كان شهر غريب جدا. كل حاجة فيه كانت غريبة، وكان ممل فوق محد يقدر يتصور. ومن أول يوم فيه وهو بيبشر بالخير. في أول مايو اللي كان هو عيد العمال أعلنوا عن العلاوة الاجتماعية اللي هتبقى 30 في الميه وطبعا الكل فرح وقالوا كتر خير الحكومة الكريمة اللي هتدينا أكبر علاوة وهللت الجرايد القومية واحتفلت بأكبر علاوة في التاريخ. وأنا طبعا تفاءلت مع إني مش هاخد العلاوة (قطاع خاص بقى وملناش في الطيب نصيب)، قلت مش مشكلة أهم حاجة إخواني في الشعب يكونوا مبسوطين وأكيد برضوا هينوبني من العلاوة حاجة. لكن يا فرحة ما تمت، هل علينا يوم 5 مايو وأعلنوا الزيادة في الأسعار اللي وصلت لأكثر من 50 في المية، طبعا اتحرق دمي يعني أنا مخدتش العلاوة وكمان هادفع الزيادة في كل حاجة. بدأت يوم 6 مايو أدفع مواصلات زيادة واتعكنن على الصبح وعلى المسا، ده غير طبعا الخناقات المتواصلة كل ما أركب أي مواصلة سواء ميكروباص او اتوبيس، لدرجة إن فيه يوم الميكروباص وقف في وسط الكبري وقال مش طالع غير لما أخد الزيادة واللي عايز ينزل يتفضل وبالتالي اتأخرت على الشغل ومضيت تأخير، يعني مش بس مش هاخد الزيادة لأ ده أنا هيتخصم مني كمان. قلت مش مشكلة برده فيها إيه يعني لازم استحمل علشان الغلاء العالمي...وهكذا استمر شهر مايو مع زيادات مختلفة في الأسعار (الزيت والسكر والأرز، ده غير طبعا العيش) وبعد ما عدى نص الشهر على خير ووصلنا لخمسة وعشرين منه طلع علينا القرار بتاع الطوارئ وقال مستمرين في الطوارئ لحد 2010، وتقريبا مايو ده قال أنا مش سايبكوا غير لما أطلع عينكوا، وأنا بترجاك أيها الشهر الغريب جدا أن ترحل وتتركنا فكفاك ما فعلته بنا حتى الآن،فماذا فعل بكم مايو؟

حتى في كوريا
التفرقة بين الولد والبنت موضوع كبير قوي والناس اتكلمت فيه كتير. في ناس تقول الولد أحسن من البنت وناس تقول البنت أحسن من الولد (ودول طبعا يتعدوا على صوابع الإيد الواحدة) وناس مبتفرقش معاها أصلا. لكن الواقع بيقول إن الولد والبنت فعلا مختلفين يعني في فرق بينهم لكن مش معنى كدة إننا نفرق بينهم في المعاملة, طبعا في طريقة لمعاملة البنت وطريقة تانية لمعاملة الولد، لكن أنا قصدي منفرقش بينهم بإننا نعامل حد أحسن من التاني. لازم الناس تتعامل مع الولد والبنت من غير ما يكون في دماغهم إن ده ولد ودي بنت. يعني مثلا عندنا هنا لو بنت اتكلمت بصوت عالي تبقى قليلة الأدب، إنما لو ولد اللي عمل كدة يبقى راجل ولازم يعلي صوته زي ماهو عايز. مش معنى كده إن البنات يعلوا صوتهم بس المفروض زي ما هتكون البنت ذوق ومبتتكلمش بصوت عالي يكون الولد كدة برده. عموما الموضوع ده كبير ومش هيكفي فيه كلام للصبح لكن الغريب إن أنا اكتشفت إن موضوع التفرقة بين الولد والبنت والمجتمع الذكوري دي مش عندنا إحنا بس دي في دول كتير حتى أمريكا اللي احنا بنقول عليها بلد الحرية والمساواه فيها التفرقة دي وأنا استغربت جدا لما واحدة أمريكية هي اللي قالتلي الكلام ده، دي حتى كوريا في التراث بتاعهم بيعتبروا إن العائلة اللي معندهاش ولاد وعندها بنات عائلة مغضوب عليها. تخيلوا حتى في كوريا..........

أنا أفكر إذن أنا موجود

لا معنى لحياتك إذا لم تعرف من أنت وماذا تريد وكيف ستحصل على ما تريد؟!!

الحياة بنعيشها مرة واحدة عشان كدة مش لازم نضيع منها أي وقت في التفكير، ده الكلام اللي بقوله لنفسي كل يوم عشان اليوم يعدي، وأنا فعلا مقتنعة بالكلام ده لكن المشكلة إن محدش يقدر يوقف تفكير، رغم عننا هنفضل نفكر دايما في اللي بيحصل حوالينا واللي هيحصل لنا واللي بنتمنى إنه يحصل. وأنا هنا هكتب عن كل اللي بفكر فيه وأحاول أن أشارك أفكاري مع غيري. ممكن أفكارك تخليك تطير بعيد أبعد مما تتخيل وتخليك تحس بكل حاجة حواليك عشان كدة فكر واحلم وعيش وميهمكش أي حد يقولك إنت بتضيع وقتك في التفكير. فكر واحلم وتمنى، لتثبت وجودك في هذا العالم.