تفاءلوا خيرا تجدوه..........السر

في محاولة لخلع النظارة السودا والنظر إلى الدنيا انطلاقا من اغنية الحياة بقى لونها بمبي، اكتب اليكم هذا البوست. ولنبدأ معا في التفكير بصورة إيجابية، سمعت مؤخرا عن ما يسمى بقانون الجاذبية أو Law of Attraction. ومش عايزاكوا تتخدعوا بموضوع الجاذبية ده وتفتكروني هاتكلم عن نيوتن أو عن الفيزياء، أنا أصلا عندي عقدة من نيوتن وكل علماء الفيزياء ومفيش بينا عمار من أيام الثانوية العامة:)))

قانون الجاذبية اللي انا هتكلم عليه هو الموضوع الرئيسي اللي بيدور حواليه كتاب مهم جدا وحقق أعلى مبيعات تحت عنوان The Secret أو السر، الكتاب نشر مترجم إلى العربية عن مكتبة جرير، وهو كتاب من كتب self help بيقدم قانون الجذب أو الجاذبية وكيف كان هذا القانون هو السر في نجاح كل العظماء في العالم على مر التاريخ وان كل ما حققوه كان نتيجة لإن ما فعلوه كان يتماشى في تناغم مع قانون الجاذبية. فبدون استثناء، لدى كل البشر القدرة على تحويل أي نقاط ضعف أو أي معاناة إلى قوة يحققون من خلالها كل ما يتمنون.

وبعد النجاح الكبير اللي حققه الكتاب، تم تحويل الكتاب إلى فيلم وثائقي وإلى كتاب مسموع وطبع منه أكثر من ستة ملايين نسخة.

ما هو قانون الجذب أو الجاذبية؟

قانون الجذب ببساطة زي ما هو واضح من اسمه ان الانسان عنده القدرة على جذب ما يفكر فيه، يعني لو الواحد فكر بطريقة سلبية هيلاقي كل حاجة حواليه سلبية ولو فكر بإيجابية هيحصل العكس، يعني طريقة تفكيرك هي اللي بترسم حياتك.

ستحصل على ما تفكر فيه سواء أردته أو لم ترده ، فأنت تحصل على ما تستثمر طاقتك فيه سواء أردته أم لم ترده وهذه الطاقة تجذب الطاقة المشابهة لها

Like attracts like

Whatever you want wants you

Birds of a feather flock together

معنى الكلام ده إني مثلا لو فكرت في كل حاجة على إنها مش هتتصلح وان كل الأحوال هتفضل زي ماهية عمرها ما هتتصلح ، وهفضل طول الوقت عايش مكتئب لإني بفكر أصلا بطريقة تبعث على الاكتئاب، أما لو فكرت ان المشاكل هتتحل وان اللي بيحصل ده مش آخر الدنيا فعلا المشاكل هتتحل والحياة هتختلف....وفعلا في ناس كتير جدا عملت ده ونجح معاهم وحياتهم اتغيرت وفعلا قدروا يحققوا كل اللي هما عايزين يوصلوا ليه.

في كاتبة اسمها لويز هاي Louise Hay عملت كتاب اسمه How to Heal your Life كمان بيتكلم عن قانون الجاذبية وإزاي ممكن تطبيقة يخلينا ننجح في علاج مشكلات حياتنا، وفي الكتاب قدمت النصائح التالية التي من ممكن يساعدوا في تحقيق النجاح ده:

1. توقف عن نقد ذاتك

2. كن متسامح مع نفسك

3. كن رقيق ولطيف وصبور

4. غير من طريقة تفكيرك

5. امتدح نفسك

6. ادعمها

7. تصالح مع سلبياتك

8. اعتني بجسدك

9.انظر للمرآة في رضا

10. احب نفسك .....الآن

11. استمتع بحياتك

وأنا فعلا لما فكرت في الموضوع ده اكتشفت إن الكلام ده صح وإن الرسول (صلى الله عليه وسلم) بيدعونا لكده "تفاءلوا خيرا تجدوه"....انا مقدرش أقول إن الموضوع نجح معايا لإني لسة في مرحلة التجربة يعني بحاول فعلا أكون متفائلة وإيجابية واتمنى انه ينجح.

عندي ملحوظة بسيطة عن اختلاف طريقة التفكير بينا وبينهم، وإزاي ممكن كتاب يعمل كل الضجة دي ويحقق النجاح ده، بعد ما قرأت عن الموضوع ده وعملت سيرش في النت ، اتمنيت ان احنا في يوم من الأيام يبقى عندنا المستوى ده من الثقافة والوعي بدور الكتاب وأهميته، ياريت :))))))))

ده الموقع للي يحب يعرف أكتر عن The Secret

www.thesecret.tv

رد الفعل

أخييييييييييييرا لقيت وقت فاضي اكتب فيه، بقالي أكتر من أسبوع مطحونة، من بعد أجازة العيد، يعني اخدت أجازة اسبوع واشتغلت قصادها شغل شهر، ومن كتر الورق والكتب حاسة إني عايشة في عالم ورق ورق ورق :))

المهم إني قدرت أخطف شوية وقت واكتب فيهم عشان أكيد انتوا مفتقديني :))))))))))

على الرغم من حالة الاكتئاب المزمن اللي محصراني ومش مخلياني اعرف استمتع بأي حاجة هاحاول اني مكونش كئيبة في المدونة مش هتبقى كل الحياة كآبة حتى المدونة لازم يكون في شوية فرفشة ولا أيه؟؟؟؟

وانطلاقا من رغبتي في الخروج من حالة الكآبة وصلت للحل اللي هيخلي كل أيامنا وردية وزي الفل، الحل هو أننا نستبدل البني آدمين بالآليين، أو إننا نحول البني آدمين لآليين ونبقى عملنا جميل في تاريخ الإنسانية هيشيلهولنا لنهاية التاريخ، أنا شايفة إنه حل عبقري هيوصل بينا لبر الآمان ونبقى دولة من الدول المتقدمة إن مبقناش الدولة المقدمة الوحيدة في العالم............ولو ده محصلش هابقى أنا ارتحت على المستوى الشخصي وأكيد ده برده هيفيد تاريخ الإنسانية :)))))))))))))

معلش استحملوني لو بهيس :))))))))))

المهم نرجع لموضوعنا لو الناس بقوا آليين هتتحل أول مشكلة وهي العصبية، لأن مش معقول الإنسان الآلي هيتعصب، يعني لما تركب الميكروباس الصبح وانت رايح الشغل مش هتلاقي حد يزغرلك ولا يقولك وسع شوية وهو وشه بيطق شرار، ولا هتلاقي سواق ميكروباس نازل من بيتهم وناوي يتخانق (يا إما مراته منكده عليه أو حماته أو حتى يكون بيتفرج على إعلانات احسبها صح تعيشها صح، وبلدنا بتتقدم بينا) يطلع السواق بالميكروباس الطائر ويعمل خمسات ولا أجدعها عربية أمريكاني وأول ما تنزل منه تتشاهد وتحمد ربنا انك لسة عايش، وبرده مش هتلاقي الراجل اللي بيقطع تذاكر المترو اللي كل ما اقطع من عنده تذكرة لازم يتخانق معايا وبعد فترة اكتشفت انه كده مع كل الناس وبقيت لما اشوفه قاعد في الشباك بقطع من شباك تاني، والتاني اللي وقفنا في الطابور عشان يسلم على واحدة يعرفها بتقطع من عنده تذكرة وقال ايه بيقولها خلي تقولش هيا بتقطع تذكرة في المترو اللي ورثه عن المرحوم دادي.........وأكيد برده لو بقينا آليين هنركب المترو الزحمة بهدوء من غير وصلة الصويت والزعيق اليومية....

والأهم بقى من كل ده إن لما الناس يبقوا آليين هنفهم بعض بسهولة ومش هيبقى فيه اللوغاريتمات اللي احنا عايشين فيها، يمكن ساعتها اعرف مين الكويس ومين الوحش، مين الأبيض ومين الإسود، الناس كلها بقت رمادي متبقاش عارف ده معاك ولا عليك، ده طيب ولا خبيث.........الناس كلها بين البينين، مفيش خط واحد كل الناس ماشيين عليه في متاهة كلنا بندور ونلف حوالين بعض فيها، الناس دول بقى أنا سمتهم الرماديين، الرماديين احتلوا الأرض وهما اللي عايشين في الزمن ده، هما اللي عارفين ياخدوا حقهم ويوصلوا للي هما عايزين بغض النظر عن الضحايا، ولأني لا أفهم الرماديين، مش عارفه اتعامل معاهم وعشان كده أنا بتمنى كل الناس يتحولوا لآليين ولحد ما ده يحصل أن مش هبقى غير رد فعل، أيوان، أنا مجرد رد فعل مش أكتر

عجائب الدنيا السبع

كل سنة وانتم طيبين وعيد سعيد علينا كلنا

العيد ده طبعا مناسبة سعيدة عشان كلنا نزور بعض ونعيد على بعض ونقضي وقت مع الناس اللي مش بنشوفهم غير في المناسبات اللي زي دي، وعشان تعمل ده يبقى لازم تخرج، وانك تخرج في شوارع مصر المعمورة في العيد، فده بيعتبر مغامرة جريئة لازم اللي يقوم بيها يكون من غير سيستم أعصاب، ويكون أصلا معندوش مرارة ولا حتى بلاستيك..لكن رغم اني كنت عاملة احتياطاتي لليوم ده وعارفة اني هاخرج في العيد يعني عملت شط داون لسيستم الأعصاب، وشيلت المرارة البلاستيك واستعديت اتم الاستعداد ، مقدرتش برده امنع حرقة الدم. اللي يمشي في شوارع المحروسة هيكتشف ان احنا بقى عندنا معالم جديدة، ايوه، يعني مش الفراعنة بس اللي سابو لنا الأهرامات وأبو الهول.........لأ احنا الجيل الجديد بقى عندنا آثار هنسيبها للأجيال اللي جاية يتفشخروا بيها ويعيشوا عليها عشان السياحة تبقى فعلا خير لينا كلنا....وتتمثل الآثار الجديدة اللي هنسيبها لأولادنا وأحفادنا في أكوام الزبالة....

وطبعا بما أن كل جيل لازم يكون احسن من اللي قبليه فالفراعنة عملوا ثلاث أهرامات في الجيزة لكن احنا عملنا أكوام ملهاش عدد في كل حتة في القاهرة الكبرى، من أولها لآخرها، وبما إني شاهدة على بناء عدد لا بأس به من أكوام الزبالة احب اسجل للتاريخ ازاي الشعب المكافح والحكومة والشركات الأجنبية تكاتفوا يد في يد لبناء هذه الأكوام المرشحة لدخول عجائب الدنيا السبع.

وهابدأ بدور الحكومة طبعا لأنها هي الخيط والبكرة....حكومتنا الرشيدة عملت عقود لشركات أجنبية تيجي تلم الزبالة، وده طبعا لأن الحكومة بتعتز بأبنائها ومتقدرش تشوفهم بيلموا الزبالة بنفسهم لأن كرامتهم عندها اهم من كل حاجة،فجابت الأجانب ودفعتلهم الألوفات عشان تحافظ على كرامة ابنائها..والفكرة بدأت في اسكندرية بشركة فرنسية حصلت على 100 مليون جنية سنويا للقيام بعمليات النظافة بالمحافظة ومدة العقد 15 سنة، وطبعا تنافست الشركات الألمانية والفرنسية وغيرها على باقي المحافظات لأن العروض اللي مقداماها الحكومة عروض مغرية جدا تسعى إليها أي شركة من الشركات دي. وبدأت طبعا النتائج المبهجة للصفقة اللي قامت بيها الحكومة وانتشرت صفائح القمامة في كل الأماكن وانتشر عمال النظافة في الشوارع (اللي هما مصريين برده مش أجانب)

وتاني خطوة قامت بيها الحكومة انها اضافت قيمة جمع القمامة على فاتورة الكهرباء، وده طبعا عشان تسدد الفلوس للشركات الأجنبية، وفي نفس الوقت استمرت رئاسة الحي في جمع رسوم القمامة من المنازل ، يعني بقينا بندفع مرتين، مرة مع الكهرباء ومرة لرئاسة الحي....المشكلة بقى ان الزبالة بقت تزيد مش تقل، يعني صفائح القمامة اللي هما عملوها بتتملي ومحدش بيشيلها من مكانها وبالتالي بتتراكم القمامة فوق بعضها وتكون كوم زبالة.....أما بقى الدور اللي لعبه الشعب المكافح فهو طريقته المبتكرة في التعبير عن اعتراضه على اللي بيحصل، الناس رفضوا يدفعوا الفلوس لرئاسة الحي وبالتالي مبقاش حد ييجي ياخد الزبالة من البيوت، والنتيجة انهم بقوا يعملوا اكوام جنب البيت بيرموا فيها الزبالة بتاعتهم، يعني على الرصيف تحت الرصيف حوالين عمود النور وهكذا....لحد ما وصلنا لأن بين كل كوم زبالة وكوم زبالة كوم تالت........وبكده يبقى على نهاية العام الحالي هنحقق الرقم القياسي في أكوام الزبالة. ويمكن تزيد عجائب الدنيا السبعة ويبقوا كلهم من مصر.

السعادة

يقضي معظم الناس كل حياتهم بحثا عن السعادة في محاولة دائبة للوصول إليها. وينجح بعضهم فعلا في الوصول إليها بينما يفشل البعض ويعتبرون انهم قد أضاعوا حياتهم هباء. ولكن هؤلاء الذين يعتقدون أنهم قد فشلوا لا يعلمون أن السعادة كانت أمامهم لكنهم لم يتمتعوا بالوعي الكافي ليستمتعوا بها. فقد اعتقدوا أن السعادة هي نجم عال في السماء لا يمكنهم الوصول اليه، ونسوا أن بإمكانهم ان يتمتعوا بجمال هذا النجم وضيائه من مكانهم على الأرض دون أن يحاولوا الوصول إليه. فكي تستمتع بالسعادة عليك أن تدرك جيدا أن سعادتك بجوارك وأن الشئ الوحيد الذي تحتاج إليه كي تصل إليها هو أن تستمتع بكل لحظة من لحظات حياتك وكأنك اللحظة الأخيرة لك. لا تفكر فيما حدث أو فيما سيحدث، قد يكون ذلك ليس بالأمر السهل عليك، فأنت لا تستطيع أن تنسى آلامك وأن تتناسى الأحداث المؤسفة التي تمر بك. وأنت على حق ، وإنما ما عليك فعله في الحقيقة هو أن تفكر فيما حدث على أنه قدر، نعم فما حدث لك كان شيئا مكتوبا ولابد أن يحدث....فكلنا مقدر لنا أن نتألم وأن نعاني. وإذا لم تتألم، ولم تحزن، لن تشعر أبدا بمعنى السعادة. فهؤلاء الذين يعانون من الويلات والمآسي، هم أكثر الناس احساسا بلحظات السعادة وتقديرا لها.

لماذا؟؟

هو: الا يكفي ما حدث حتى الآن؟

هي: نعم يكفي، لقد تعبت

هو: ولماذا دائما تهربين؟

هي:ربما لأني خائفة.

هو: مما تخافين؟

هي: مما اخاف؟!!! اخاف من نفسي ، اخاف من الآخرين.

هو: ولما تخافين من نفسك؟

هي: ان ما يخيفني هو انني اعرفها جيدا، اعرف مدى حساسيتها وضعفها، واعرف كيف انها لا تقوى على تحمل الألم والمعاناة. ويبدو انها ستظل هكذا؛ لن تشعر بأي شئ ولن تعيش اي تجربة حقيقية لأنها خائفة، ستبقى دائما في الجانب الآمن تحاول تجنب اي ألم ومعاناة

هو : ولما تخافي من الآخرين؟

هي: لعل السبب في ذلك انني لا اثق بهم، او يلزمني الكثير من الوقت وفي النهاية ايضا يصعب علي ان اثق بهم. نعم، قد يبدو ذلك قاسيا بعض الشئ لكني ببساطة لا استطيع الوثوق بهم، واذا وثقت بهم خفت من ان اتعلق بهم، فانا اخاف من ان اتعلق بالناس وان ارتبط بهم.

هو: ولماذا؟؟؟؟؟

هي: لماذا، لماذا ؟ لما كل هذه الأسئلة، توقف عن طرح الأسئلة واتركني. لقد سئمت من اسئلتك ومن محاولتك للدخول إلى اعماقي ، لا تحاول ان تخترقني لتعرف ما بداخلي ، فلن تستطيع ان تفهم ما يدور بالداخل حتى لو حاولت لاني انا ببساطة لا افهمه ولن استطيع ان اشرحه لك...........كل ما اعرفه هو اني ارغب في التحرر من قيود الزمان والمكان، تتملكني الرغبة الشديدة في التحليق عاليا وفي الابتعاد عن كل ما هو مادي.........اتعرف ما اتمناه فعلا .....اتمنى ان تحملني احلامي إلى عالم آخر ، عالم يخلو من الحسابات والاعتبارات ، عالم يقدر المشاعر والروحانيات...........عالم لا يعترف بالماديات................ولعلي في هذا العالم لن اخاف من نفسي او من الآخرين.

تاج الجزيرة ..............السلطانية

صديقتي الصدوقة برنسيس أطلقت علي الرصاص والطلقة طلعت تاج وقع فوق دماغي، وبما إن التاج ده أو تاج يتحط فوق راسي ، هاسامحها على الرصاصة وهاخد التاج بحسن نية :)))))))))

1. بدأت تدون إمتى ودخلت عالم التدوين إزاي؟؟

سؤال وجيه، أنا بدأت التدوين في شهر 5 اللي فات، ودخلته عالم التدوين عن طريق صديقتي الصدوقة برنسيس برده اللي دبستني في تاج الجزيرة ده، هي قالتلي انها عملت مدونة، وانا كنت بسمع كتير عن موضوع المدونات ده وقلت لما ادخل اشوف ايه الحكاية، وعجبني الموضوع اوي ودخل دماغي وقررت ادخل العالم الغريب ده، وبعد عذاب (عملت المدونة ومكنتش عارفة ادخل عليها ازاي) عرفت ازاي ممكن اعمل مدونة....

2. ايه كان انطباعك في البداية؟

في البداية، كان عندي حالة تردد فظيعة، كل شوية اقول هكتب موضوع وبعدين الغيه وافكر في غيره، مع اني كنت علطول بكتب في النوت بوك بتعتي، بس عمري ما فكرت ان الكلام اللي بكتبه يبقى منشور على النت وكل الناس ممكن تقراه، وبعد ما كتب لقيت المدونة صحراء جرداء ولا حد بيقرا ولا حد بيرمي السلام، وبعد فترة بدأت تندع بشر والدنيا مشيت

3. مين أكتر حد بتحب تعليقه على بوستك الجديد؟

اكتر حد بحب تعليقه ........مممممممممممم..........الضيوف ، يعني الناس اللي بتعلق لأول مرة، وطبعا الزائرين الدائمين للبلوج :)))

4. ايه اهم حاجة اتعلمتها من التدوين؟

أهم حاجة اتعلمتها من التدوين الجرأة في التعبير عن أفكاري، لأني كنت زمان بكتب حاجات كتير وبعد ما اكتبها اقطع الورقة وارميها ومكنتش بحب حد يقرا الكلام اللي بكتبه، لكن الموضوع اختلف لما بدأت التدوين ومبقتش زي الأول.....

5. حاسس ان التدوين ليه تأثير؟

اكيد طبعا ليه تأثير، لو مش بيأثر على كل الناس على الأقل بيخلي كل واحد يخرج أفكاره ويتناقش فيها مع الناس ويوصل رأيه خاصة في الوقت اللي بقينا نحس فيه ان رأينا ميهمش حد :))))))))

6. أذكر 5 أحلام على الاقل تخص ماضيك وتحلم فيها بتغيير أشياء ماذا ستعدل وماذا ستترك ؟

زمان وانا صغيرة كنت باحلم اكون دكتورة ....بس فرقت على ثلاثة من عشرة :))))))))

وكنت باحلم اني اعيش في اسكندرية

وكنت بحلم اني اعيش في فيلم كارتون :)

وكمان كنت بحلم اني اكبر واتخرج واشتغل :( وهو ده بقى الحلم اللي نفسي أغيره .....ممكن ارجع واغيره؟؟؟؟

7. اذكر 5 أحلام على الأقل تخص مستقبلك؟

راحة البال ورضا الله

الاقي الشخص اللي اعيش معاه بقية حياتي ومش ضروري يعني ييجي على حصان، ممكن عربية ؛)

أعيش في بيت صغير على بحيرة وحواليه خضرة من كل جانب

اصحابي يزيدوا وما ينقصوش

بس كده

8. أذكر شخصين على الأقل متواجدين في حياتك حالياكنت تود وجودهم قبل الآن بزمن؟

أصحابي اللي موجودين معايا دلوقتي هما فعلا اللي كنت اتمنى وجودهم قبل الآن بزمان وفعلا من غيرهم مكانتش شخصيتي هتبقى كده دلوقتي وأنا بشكرهم لانهم من غير ما يعرفوا غيروني وخلوني احسن من الاول بكتير ؛))))

9. أذكر شخصين على الأقل غير متواجدين في حياتك حاليا كنت تود وجودهم الآن أو في حياة أولادك مستقبلا ؟

اتمنى اني الاقي الشخص الملتزم بدينه ومبادئه واللي ينفع يكون قدوة ليه ولأولادي...................

10. على من تطلق الرصاص؟

ولد مصري

همس

جنة

بلو وايفز

فارس بلاجواد

هذه بلادي لم تعد كبلادي

المشهد الأول:

تدخل بهية إلى بيتها المتواضع الذي هو عبارة عن عشة تحت سفح الجبل وهي تحمل العديد من الحقائب ، تجد اختها سنية تنتظرها وهي تحمل طفلة رضيعة بين يديها.

بهية: أهلا يا سنية جيتي امتى من السفر؟؟

سنية: جيت من يجي ساعة وجوزك فتوح فتح لي الباب وخرج يعمل مشوار، حمد لله على سلامتك يا اختي، ما شاء الله البت زي القمر طالعة لامها.

بهية: الله يخليكي يا اختي ، هو فتوح مقلكيش رايح فين.

سنية: قال رايح يجيب بقية حاجة السبوع، ألف مبروك ، تتربى في عزك.

بهية (وهي تضحك بصوت عال): قوللي تتربى في فقرك، عز مين بس ما انت عارفة البير وغطاه، ده هي العشة دي اللي أويانا ويدوب الشغلانة بتاعة فتوح اللي بتجيب قوت اليوم، ده ربنا ساترها على عبيده.

سنية: قال صحيح مش كان المفروض يسلموكوا الشقة الجديدة اللي في المساكن بتاعة الحي.

بهية: اديكي قولتي بلسانك، المفروض، هو من امتى المفروض يحصل بيحصل، كله كلام في الهوا، بتوع الحي يقولوا روحوا للاسكان وبتوع الاسكان يقولوا روحو للحي، وفي الآخر الشقق بتروح للناس اللي هما عايزنهم ويسكنوا فيها اللي على مزاجهم، حسبي الله ونعم الوكيل.

سنية: معلش بكرة تتعدل المهم وريني جبتي ايه للبنت.

المشهد الثاني:

انهيار صخري وصراخ وعويل ومن تحت الأنقاض يصدر صوت بهية.

بهية: بنتي يا ناس محدش شاف بنتي، بنتي يا سنية، بنتي يا فتوح، بنتي يا ناس

سنية: اهدي يا بهية، اهدي الحكومة هتيجي وتطلعنا من هنا، ان شاء الله هتلاقي بنتك سليمة وزي الفل.......

أصوات الصراخ تتعالى وانهيار المزيد من الصخور

المشهد الأخير:

بهية: سنية انتي مش بتردي عليا ليه، فتوح انت فين ، انتوا مش سامعين ولا ايه، هيطلعونا دلوقتي وهنلاقي البنت ، يا سنية

تخفت الأصوات مع حلول الليل، ولا يتبقى سوى صوت جهاز راديو، تنصت له بهية..........أعزائي المستمعين ورد اليا الآن الخبر التالي ، عثرت قوات الإنقاذ على جثة فتاة رضيعة لا يتجاوز عمرها 7 أيام وبجوارها أكياس فيما يبدو انها أكياس سبوع. هذا وقد صرح المسئولين ان كل من المتضررين من الحادث سيحصل على تعويض 5000 جنية إلى جانب شقة من المساكن المجهزة لسكان الحي........

بهية: فتوح، سنية، سامعينن هناخد شقة.............هناخد شقة...........هناخد شقة.

-------------------------------------------------------------------------------------------------

نسألكم الفاتحة لشهداء الدويقة.......................

------------------------------------------------------------------------------------------------

تناثرت حولي مرايا الموت والميلادِ

قد كان آخر ما لمحت على المدى

والنبض يخبو صورة الجلادِ

قد كان يضحك والعصابة حوله

وعلى امتداد النهر يبكي الوادي

فصرخت والكلمات تهرب من فمي

.هذه بلاد لم تعد كبلادي

فاروق جويدة