مذكراتي 3: ساطور

مذكراتي العزيزة:

آسف على التأخير، أفتكر آخر حاجة وصلت عندها كانت إني روحت فعلا للعنوان اللي إدهاولي الراجل صح؟ أول ما وصلت هناك طلبت من الخدامين إني أقابل الراجل، كان البيت عبارة عن قصر فخم جدا وطبعا لما شوفت العز اللي هو عايش فيه فهمت ليه ابن اخوه جالي. وفعلا دخلت له ولقيته تعبان على الآخر وعلى السرير. حاولت أتكلم معاه لكنه مكانش سامعني وطلب مني إني أقرب من السرير. قربت منه وحاولت أتكلم معاه وأنا بقرب منه غصب عني (وركزوا كويس في غصب عني دي) ولسوء حظي اتخبطت في السرير. ولسوء حظي بردو السرير خبط الستارة فوقعت بالحديد اللي مساكها في الحيطة على رأس الراجل ومات في ساعتها. وفي لحظة كنت نطيت من الشباك ومحستش بنفسي إلا وأنا في البيت. طبعا مش هاقدر أوصفلك الرعب اللي أنا كنت فيه. هتقوليلي إزاي سفاح زيك يخاف، المشكلة إني أنا سفاح بالسمعة يعني عمري فعلا معملت حاجة وحتى لو كنت استغليت الفرصة اللي جاتلي فأنا عمري موصلت للقتل، وطبعا مجاليش نوم وفضلت سهران وأنا مرعوب طول الليل.

وطلع عليا الصبح وفجأة سمعت خبط على الباب طبعا اترعبت وقولت ده أكيد البوليس عرف باللي حصل وجاي يقبض عليا، استنيت شوية وبصيت من الشباك ملقتش حد تحت، مشيت بالراحة لحد الباب وفتحته لكن ملقتش بوليس ولا أي حد قدام الباب كل اللي لقيتوه كان ورقة مكتوب فيها التالي:

عزيزي ساطور:

شكرا على التزامك بالاتفاق. أنا بعتلك الفلوس اللي إحنا اتفقنا عليها مع الجواب.

شكرا ليك

من

؟؟؟؟؟؟

إنت عارف

مأخدتش الفلوس ساعتها لكن بعد كده اتزنقت واضطريت أصرفهم. واللي عرفته بعد كده إن الراجل العجوز اللي مات كان كاتب كل أملاكه للخدامين، وده فسر لي هم ليه مبلغوش عني البوليس وقالوا إني أنا اللي قتلتوا.

بعد الحادثة طبعا بقت سمعتي زي الطبل. وجالي ناس كتير من كل مكان بيطلبوا خدماتي. فيهم اللي عايز يقتل مديره واللي عايز يقتل مراته وكمان اللي عايزين يقتلوا مدرس الفصل بتاعهم اللي مبيبطلش دروس خصوصية وغيرهم وغيرهم كتير....ده من كتر الناس اللي جاتلي حسيت إن مفيش حد مش عايز يقتل حد ويتهيئلي كده إن كل واحد لو جتلوا الفرصة دي هيلاقي كتير عايز يقتلهم..ما علينا ....نرجع لموضوعنا طبعا نتيجة لضغط الشغل قررت إن أعين صبي. نشرت الإعلان في الجرنال لكن طبعا مقولتش إني عايز مساعد سفاح كل اللي كتبته في الإعلان كان:

مطلوب

رجل بين ال20 وال25، قاسي القلب قوي الشكيمة لا يؤمن بالرقة والطيبة والرحمة. رجل ليس له أصدقاء أو أقارب، مرتب مجزي جداااااا

الاتصال قهوة عم أحمد

ولتاني مرة الناس فأجوني، تخيلي جالي عدد مهول من الناس، يعني كل دول ممكن يتخلوا عن الرحمة والرقة والطيبة والأصدقاء والأقارب عشان الفلوس!!!!!!!!.

وكان السؤال إزاي هختار الشخص المناسب من بين كل الناس دي وكانت دي مهمة صعبة لحد ما وصلت بعد تعب للشخص المناسب.....