ساطور : العودة

مذكراتي العزيزة:

عارف إني أتأخرت عليكي كتير بس اليومين اللي فاتوا كانوا مليانين مشاكل هابقى احكيلك عليها، بس الأول هكملك اللي حصل بعد ما اخترت المساعد بتاعي. بعد ما اتقدملي ناس كتير اخترت الشخص المناسب وكان الشخص ده هو نادر. بصراحة كان نادر فعلا نادر. كان شخص شكله يبان قوي أوي لكن في الحقيقة هو طيب والصراحة أكتر ميزة عجبتني فيه انه كان عقله على قده، وفهمه كان بطئ. وبالنسبه ليا كان لقطة لأنه مش سهل انك تلاقي شخص بالصفات دي مجتمعة. لكن كانت مشكلته الوحيدة هي إنه بيسأل أسئلة كتيرة وده طبعا خطر في الشغلانة بتاعتنا دي، لكن مش مشكلة ما دام هيبقى تحت أمري ويسمع كل كلامي ممكن أبقى استحمل أسئلته أو أحاول أخليه يبطل العادة دي.

وبكده بقيت أنا ونادر بنشتغل وايدنا في ايد بعض لخدمة البشرية المعذبة التي تعاني من القهر والظلم. وقبل ما احكيلك على المشكلة الكبيرة اللي كنت فيها اليومين اللي فاتوا احب اقولك القسم اللي نادر اخده على نفسه قبل ما يبدأ شغل معايا:

أقسم أنا الموقع أدناه أن أكون مخلصا وأمينا وعادلا في عملي مع المعلم ساطور وأن أكون في خدمته مهما كان الطلب اللي هيطلبه مني (إلا في حالة لو طلب مني اني أقتل نفسي عشان العمر مش بعزقة) وأقمس أن لا أسمع ولا أرى ولا أتكلم وان امنع نفسي من سؤال أي أسئلة ملهاش لزمة.

نادر

وطبعا نادر منفذش أي حاجة من القسم وأنا كمان مكنتش بعاقبه لما كان بيعمل كده، لأن أنا أصلا سفاح والسفاح مينفعش يبقى ليه قسم ودي مجرد شكليات.

وبكده بدأت أنا ونادر نشتغل مع بعض واكتشفت مع مرور الوقت أن مشكلة الأسئلة الكتيرة مكانتش المشكلة الوحيدة عند نادر ، لأن غباءه اللي مشفتش زيه قبل كده اتضح مع الوقت خصوصا انه معرفش إن انا سفاح تخيلوا، كان بياخد المواعيد ويمشي الشغل وياخد الفلوس من الناس لكن عمره ما اكتشف ان انا سفاح.

المهم خليني احكيلك اللي حصل، في يوم حار من أيام شهر يوليو كنت قاعد في المكتب بتاعي (نسيت أقولك أني عملت مكتب استيراد وتصدير عشان اقابل الزبائن ومحدش يعرف نشاطي الحقيقي غيرهم) وكنت بحاول اني اتجنب أي حوار مع نادر اللي كان ودود زيادة عن اللزوم اليومين اللي فاتوا. وفي الوقت ده سمعت صوت خطوات على السلم. فكرت إنه ممكن يكون واحد من الجيران اللي معندهومش دم اللي بيحبوا يتجسسوا عليا. لكن طلعت غلطان لأن صوت الخطوات دي كانت خطوات سمسم. أيوه سمسم اللي كان أشهر ولد وأقوى ولد في المدرسة. مصدقتش نفسي سمسم بنفسه هنا عندي وكانت صدمتي الأكبر ان سمسم اللي كان ضخم وزي الحيطة بقى لا حول له ولا قوة. كان شكله يصعب على الكافر، رفيع قوي وشعره مبهدل وشكله زي المتشردين وكأنه مكلش بقاله سنين. وبعد ما فوقت من الصدمة رحبت بيه وعزمته على حاجه يشربها وبعدها على الغدا. وبعد ما سمسم خلص أكل، بدأ سمسم يبكي ومعرفتش أعمل ايه، نزل على ركبته واترجاني. وفي اللحظة دي الشر سيطر عليا وفكرت إني أرميه بره واستغل الفرصة عشان أعوض الذل اللي كنت فيه زمان لكن للأسف ولأن "هادي مطيع" لسه جوايا مقدرتش أعمل كده. ساعدته انه يقف على رجليه وسألته بهدوء عن اللي حصل ووصل بيه للحاله دي..........آسف لازم اسيبك دلوقتي عشان أشوف المصيبة اللي نادر وقعني فيها، أشوفك قريب

المعلم ساطور