ساطور: نادر جدا

مذكراتي العزيزة:

سألت سمسم عن اللي حصل وصل بي للحالة اللي هو فيها ومين بين دموعه قدرت بصعوبة اجمع خيوط حكايته. وبصراحة اكتر حاجة فاجأتني ان سمسم ما بقاش شرير زي زمان على العكس بقى طيب وبرئ زي بالضبط لما كنت هادي مطيع. سمسم كان اشهر واشجع واحد في المنطقة وده كله لحد ما وقع في حب بنت جميلة كانت معانا في المدرسة (البنت اللي كنت انا معجب بيها من بعيد) وبالضبط زي شمشون ودليلة، كانت هي السبب في انه فقد كل قوته، لانه من حبه ليها كان بيطاوعها في كل حاجة تطلبها منه. وكانت هي بتستغله أسوأ استغلال، في المدرسة مثلا كانت بتخليه يشيلها الشنطة لحد البيت ويكتبلها الواجب وبعد كده كانت بتخليه يجيب الطلبات للبيت وحاجات تانية كتير، المهم ان الموضوع كان ماشي عادي وسمسم كان سعيد لانه بيرضيها لغاية ما جه اليوم اللي قالتله فيه انها مش هينفع تكمل معاه وانهم لازم يسيبوا بعض. طبعا سمسم اتصدم وحاول يفهم منها السبب في الأول مرضيتش تقوله واتهربت منه لكن لما اصر انه يعرف كانت اجابتها انه مش قوي كفاية عشان يليق بيها، ومش كده وبس لأ دي كمان قالت انها خلاص لقت شخص تاني أقوى منه وأشهر منه بتحبه ومستعدة تقضي معاه بقية حياتها.

سألته بكل براءه: ويا ترى الرجل الأقوى المشهور اللي بتحبه يبقى مين؟

اكيد طبعا عرفتوا مين، انا، المعلم ساطور، اشهر واحد في المنطقة في الوقت الحالي. طبعا تنحت ومعرفتش ارد على سمسم ولا عرفت اقوله ايه ، اه انا كنت معجب بيها في يوم من الأيام بس مش من اخلاق السفاحين انهم يختلفوا مع زميل عشان واحدة، وبعدين سمسم حالته تصعب على الكافر وانا مقدرش احطم الشوية اللي باقيين فيه ده لو باقي فيه حاجة من الاساس.

المهم بعد ما تأملت في الحياة وفي غرابتها، وعدت سمسم اني اساعدة على انه يسترد حبه الضائع. ناديت على نادر، وقلت له ان احنا عندنا شغل مهم لازم نقوم بيه وطلبت منه ان يجمع معلومات عن البنت اللي سمسم بيحبها وحطيت الخطة وكانت كالتالي:

هأجر رجالة عشان يخطفوها. وأول ما يجيبوها عندي هنا في المكتب هاعذبها وابينلها اني شرير ومتوحش واتجاهلها. وساعتها هيجي سمسم وينقذها بعد ما يضربني قدامها وبكده تعرف انه اقوى مني وترجع له مرة تانية.

خطة محكمة، صح ايه رأيك؟ انا برده افتكرت انها خطة متخرش المية لكن للأسف الأمور دايما مبتمشيش زي ما احنا متخيليين. قلت لنادر على الخطة وفهمته هيعمل ايه، لكن بما انه طبعا عبقري زمانه ومفيش منه اتنين عمل آخر حاجة كنت ممكن اتخيلها. تخيل بذكاءه ان انا بعمل كل ده عشان انا بحب البنت دي وخايف عليها انها تكمل حياته مع واحد زي مستقبله مش مضمون (عبقري) وطبعا بما انه صديق مخلص مفيش منه، راح لها وقلها عن الخطة كلها بالحرف وخلاها توعده انها عمرها ما تبعد عني مهما حصل ومتصدقش اي كلمة اقولها ليها ، مش بقولك عبقري؟؟؟؟؟؟؟؟؟

وطبعا بفضل نادر وقعت في مشكلة مش عارف اخرج منها ازاي. لو كملت الخطة ، مش هاوصل للنتيجة اللي كنت مخطط لها لأن مساعدي المخلص اللي مفيش زيه ضيع كل حاجة وفي نفس الوقت مش هاقدر اقول لسمسم ان الخطة مش هتنجح لان ده هيدمره واثناء ما كنت بفكر سمعت خبط جامد جدا على الباب. فتح نادر الباب وكانت هي، بنفسها. وفي لحظة لقيتها واقفة قدامي حاولت اني افهما اني مبحبهاش وانها متمثلش اي حاجة بالنسبة لي. وكان ردها انها عارفة ان الكلام ده من ورا قلبي واني بعمل كده عشان خايف عليها وعشان خاطر سمسم . وهكذا استمر الحوار ...انا بأكد لها اني مبحبهاش واني مبحبش حد غير نفسي ، وهي مش مصدقاني وتقولي انها عمرها ما هتتخلى عني وعمرها ما هتسيبني مهما عملت.

وبعد ما زهقت طردها برة باب الشقة وهددتها اني لو شفتها تاني هاقتلها ومش هيهمني اي حاجة. قفلت الباب وقعدت على الأرض مش عارف اعمل ايه، نادر ورطني في مصيبة اكبر مني مش هاقدر اتعامل معاها ، هاسيبك دلوقتي يا مذكراتي عشان افكر اخلص ازاي من المصيبة اللي انا فيها....................