الجمعة، نوفمبر 14، 2008

تاج السعادة ..........سوري على التأخير

أول حاجة احب اعتذر لمحمد صاحب مدونة "هل تبحث عن السعادة؟" على تأخير التاج، بس كان عندي دور برد قاتل وفضلت احارب معاه اسبوعين بس الحمد لله في الآخر هو اللي انتصر عليا :)))






نيجي بقى لموضوع السعادة. السعادة دي كلمة معناها كبير اوي وبتلخص كل الانسان بيسعى ليه في الدنيا. يارب كلنا نقدر نوصل للسعادة فعلا ونحقق كل اللي نتمناه، نبدأ التاج :)






ما هي السعادة في وجهة نظرك؟






السعادة هي رضا الله ، يعني لو ربنا راضي عننا في كل اعمالنا كيد هنحس بالسعادة اللي بنتمناها في حياتنا. وبعد رضا ربنا، ممكن ألخص السعادة في ان سعادة الانسان في سعادة من يحب :)






كيف تصل إلى السعادة؟






سؤال صعب اوي لأننا طول حياتنا بنحاول نوصل للسعادة، وممكن ناس تضيع عمرها كله بتحاول الوصول للسعادة. مع ان السعادة ببساطة ممكن تكون قدامهم وممكن تكون رحلتهم في البحث عن السعادة نفسها هي كل اللي هما بيحاولوا يوصلوا ليه، لأن السعادة انا شايفاها زي النجوم مهما حاولنا مش هنوصل لها مع اننا سهل اوي نستمتع بجمالها من مكانا على الأرض.






هل السعادة طريق للنجاح؟ وضح؟






مممممممممم، والله أنا شايفه إن النجاح هو الطريق للسعادة :)))






ما هي أكثر اللحظات التي شعرت فيها بالسعادة؟






الحمد لله اللحظات دي كتير ودي من نعمة ربنا عليا، لكن ممكن افتكر ان من اهم لحظات السعادة اللي حسيت بيها كانت يوم ما اتخرجت من الجامعة وجبت التقدير اللي كنت بحلم بيه :)) وأول يوم اشتغلت فيه ، وطبعا يوم ما قبضت اول مرتب ليا :)))






هل ممكن أن تحقق كل شئ؟






صعب طبعا ان حد يحقق كل حاجة، لكن ممكن لو حد اشتغل على الحاجة اللي نفسه فيها كويس وعمل كل اللي عليه يقدر يوصل للي هو عايزه، وربنا اكيد هيساعده.






السعادة تجعلك تقبل على الحياة أم لا؟






أكيد طبعا السعادة بتخليني اقبل على الحياة، لأني لو مش سعيدة مش هبقى عايزه اعيش اساسا






هل أحسست يوما أنك وصلت لقمة السعادة؟






مش عارفه ، مقدرش احدد لأن كل ما بيبقى في لحظة سعادة بتكون اعلى من اللي قبليها فاحتمال تكون قمة السعادة دي لسة مجتش :))






لماذا تمر أوقات السعادة بسرعة؟






اعتقد لأنها لحظات حلوة والانسان مش متعود عليها، يعني مش هي الحالة السايدة عنده وعشان كمان نحس فعلا انها سعادة يعني لو احنا طول الوقت عايشين في سعادة مش هنحس بقيمتها (فلسفة :))) )






هل ترى السعادة في التدين؟






نعم، لكن دون تشدد






هل أنت متفائل وعندك أمل؟ وضح؟






انا الحمد لله متفائلة وعندي امل ان بكرة هيبقى احسن ان شاء الله :))






إذا شعرت بالحزن ماذا تفعل؟






لما بشعر بحالة حزن بحاول اهرب منها، يعني بحاول اشتت تفكيري في حاجة تانية خالص بعيدة عن الموضوع أو اشغل نفسي في حاجات كتير لدرجة اني ممكن اتعب أوي بس المهم اني محسش بالحزن ده






هل يستمر معك الحزن لفترة أم ينقضي في الحال؟






هو بيستمر لكن من جوا يعني مش ببقى مكتئبة بقى ومكشرة لأ، أنا برسم الابتسامة زي ما صديقتي العزيزة قالتلي وبعد كده بينعكس ده على الحالة الداخلية :)






إيه رأيي في الأفراد المتشائمين؟






رأيي انهم لازم يحاولوا يغيروا من طريقة تفكيرهم ونظرتهم للحياة، لأن التشاؤم بيجيب تشاؤم وانصحم انهم يتبعوا قول الرسول (صلى الله عليه وسلم) "تفاءلوا خيرا تجدوه"






.......................................................................................................................






اسمحولي يا جماعة إني استأذنكم في أجازة مرضية عشان اقضي فترة النقاهة من البرد وكمان لإن عندي ضغط شغل جامد أوي في الفترة الجاية هتوحشوني اوي .........دعواتكم

هناك 11 تعليقًا:

عاشقة القمر يقول...

انا او تعليق

اجابتك ممتازه يارب دايما تكوني في سعادة


ياختي انتي علي طوال في اجازه ههههههههههههههههههههههههههههه
سلامتك
ياريت مش تغيب كثير

blue-wave يقول...

الف سلامه عليكى
وترجعيلنا بسرعه وبسلامه
اما عن اجاباتك ف تحفه طبعا

Butterfly يقول...

إجاباتك كلها جميله ماشاء الله
ربنا يديمها عليكى سعاده يارب
وألف سلامة

mohamed ghalia يقول...

أختى العزيزة
أولا ألف مليون سلامة وربنا يرزقك الصحة والعافية دايما.
ثانيا
إجاباتك رائعة والله
واستفدت منها
حقيقى متشكر على قبولك إنك تجاوبى على الأسئلة ده شرف ليا
ثالثا
هنسمحلك بأجازة ساعتين كفاية ههههههه
فى إنتظارك دايما وربنا يسعدك هتوحشينا
تحياتى

romansy يقول...

ايه بس دا
بس ما قرينا تاج السعاده
وعشنا كل لحظه سعاده
جيتى قولتى انك تعبانه وتاخدى فتره نقاهه

طلعتينا لفووووووووووووووووق
ونزلنا مره واحده

يلا بقى

الف سلامه عليكى

وترجعلنا بالسلامه

princess يقول...

باربل ويفز
صديقتى الصدوقة:))
ايه حكاية الاجازات ده المدونات كلها قفلت ههههههه
عموما عادى خدى اجازة اصل انا مطمنة عشان احنا مع بعض علطول هتروحى منى فين هههههه
بس مينمنعش ان اللى بتكتبيه هيوحشنى
التاج ده انتى يا باربل كفاية انى كل ما اشوفك ببقى مبسوطة انتى مصدر للسعادة:)))
تحياتى

Kiara يقول...

الف الف الف مليون سلامه ليكي

واجاباتك متميزه كعادتك ياقمر

اقصوصه يقول...

جميله هي اجاباتك جدا

تروحين وترجعين بالسلامه ان شالله

وبانتظار عودتك

سالمه غانمه :)

mahasen saber يقول...

الله ينور عليكى السعاده فى رضا المولى عز وجل فعلا

بس الف سلامه عليكى من البرد يله اهه محدش يقدر يقوله حاجه فى الشتا بالذات

تروحى وترجعى بالسلامه

Gannah يقول...

بريل
ازيك؟
سلامتك من البرد
أول مرة اشوف حد بيشبه السعادة بالنجوم
يعنى نشوفها من غير ما نلمسها
سعادة من بعيد لبعيد
ربنا يسعدك يا بربل
ومتتأخريش علينا
تحياتى

ولد مصري يقول...

أولا ألف سلامة من البرد

ثانيا متهيألي الأجازة علشان زحمة الشغل مش علشان البرد إلا لو كان التدوين محتاج مجهود وأنا ماعتقدتش

صحيح إن الواحد صوابعه بتنأح عليه من كتر الكتابه بس مش للدرجة دي

على العموم ربنا يعدي زحمة الشغل على خير وترجعي بالسلامة

تحياتي