الاثنين، ديسمبر 08، 2008

جئت يا يوم مولدي في العيد الكبير :)))



كل سنة وانتم جميعا طيبين وعيد سعيد علينا وعلى كل المسلمين ويارب يجعل كل أيامنا أعياد في أعياد، عيد الأضحى ده ليه معزة في قلبي خاصة جدا مش عارفه ليه (ومحدش يقول عشان اللحمة) بحبه اوي اكتر من عيد الفطر وبحس انه فعلا عيد بجد والسنة دي بقى اتبسطت بيه اكتر عشان عيد ميلادي تالت يوم العيد :)))




البوست بتاع عيد ميلادي والعيد مع بعض كنت حاطة في دماغي اني اكتبه، وبعدين اترددت لما صديقتي الصدوقة برينسيس كتبت عندها في البلوج احتفالا بعيد ميلاد الويفز، لكن بعد كده فكرت اني لازم اكتب بوست عيد ميلادي لعدد من الأسباب أولا عشان اهنيكم بالعيد و اتمنى ليكم ان كل ايامكم تبقى أعياد ان شاء الله. وثانيا، عشان اشكر برينسيس صديقتي الصدوقة ورفيق الكفاح في الكلية ودلوقتي في الدبلومة، وبجد مهما قلت عمري ما هاقدر اوفيها حقها لأنها بجد من أقرب الناس لقلبي واطيب الناس اللي قابلتهم في حياتي حتى اني ساعات بقولها نفسي تكوني شريرة شوية مع إني اكتر حاجة بحبها فيها هي طبيتها، ربنا يخليكي ليا يا برنسيس وصداقتنا تدوم للأبد، وثالثا بقى بما إن عيد ميلادي طلع نفس يوم عيد ميلاد عاشقة القمر (سومية) فقلت لا مبدهاش بقى انا لازم اكتب البوست واقولها كل سنة وإنتي طيبة وعيد ميلاد سعيد يا قمر :))))))))))










يوم الأربع اللي جاي هكمل 22 سنة بالتمام والكمال، مش قادرة اتخيل إني عايشه بقالي 22 سنة، كتير اوي 22 سنة دول فين ايام الخمستاشر والستاشر ايام العمر ما كان في بركة، إنما دلوقتي كل حاجة اتقلت بركتها حتى العمر :))))))))))) وعيد ميلادي زي ما إنتو شايفين كده محدوف في آخر السنة، آخر شهر في السنة، ومن كتر ما هو بعيد ولإن كل أصحابي أعياد ميلادهم قبلي دايما بحس إني خلاص بقيت قدهم من غير ما يجي يوم عيد ميلادي، يعني انا حاسه إني عندي 22 سنة يمكن من شهر خمسة كده ، وعيد ميلادي اللي في شهر 12 ده مجرد شكليات :)))))))))) وبرده لإن عيد ميلادي في آخر السنة بعد إخواتي كانوا دايما يضحكوا عليا ويحتفلوا بعيد ميلادهم هما ويقولولي اعتبريه عيد ميلادك مفرقتش يعني من شهر ، وانا فاكرة إن المرة الوحيدة اللي فعلا عملت فيها عيد ميلادي واتصورت صور كتير (إثبات واقعة يعني) الصور اتحرقت وهي بتتحمض ومن يومها مش بعمل عيد ميلادي خالص وتقريبا كده مش ناوية اعمله تاني.










في ناس كتير يوم عيد ميلادها بتقعد تفكر انا عملت ايه السنة اللي فاتت دي، وتقعد تحاسب نفسها على الغلطات وكل حاجة مش صح هي عملتها، انا بقى مش من أنصار المبدأ ده خالص، مش عارفه ليه، يمكن لإني بحاسب نفسي في ساعتها وتقريبا كده الموضوع مش بيحتاج تجميع حلقات ليلة عيد ميلادي، بس انا عموما ببقى مبسوطة اوي في اليوم ده ومش ببقى عايزه حاجة تنكد عليا فيمكن بعمل عبيطة ومش بعمل الحساب ده ويمكن اكون غلط في كده.










رغيت انا كتير عن عيد ميلادي ده، بس اعمل ايه بقى هو مش بيجي غير مرة واحدة في السنة ولازم احتفل بيه :))) كل سنة وإنتم طيبين وعيد سعيد عليكم يارب، والتورتة دي بمناسبة نجاحي أنا وبرينسيس في الدبلومة يالا عشان محدش يقول حرمناكم من حاجة :)))))))










هناك 37 تعليقًا:

romansy يقول...

اول تهنئه بعيد الاضحى

اول تهنئه بعيد الميلاد


ل



رومانسى

DR.HAMAS يقول...

كل عام و انتم الى الله اقرب و على طاعته ادوم

و الف مبروك يوم ميلادك

يا رب تكون حياتك كلها فى رضا الله

و يزيد حبك انتى و صديقتك الصدوقة فى الله

و يديم المحبة بينكم




د.حماس

DR.HAMAS يقول...

على فكرة انا كدة اكبر من حضرتك بشهر بالظبط

لكن طبعا انتى اكبر مقاما

ربنا يفرح قلبك

و يرضى عنك






د.حماس

زهرة الجنة يقول...

كل سنة وانتي طيبة ياقمر وعيد أضحي سعيد

وكل سنة وانتي طيبة بمناسبة عيد ميلادك وعقبال مليووووووووووون سنة

والف مليووون مبروووك للنجاح ليكي ولبرتسيس بالرغم من انها معبرتنيش لما سالتها علي النتيجة):
المهم مبرووك للنجاح

princess يقول...

هاىىىىىىىىىىى
احلى حد ممكن تعرفه فى حياتك هى باربل ويفز
بتفهمنى من غير ما اتكلم
لما بعمل حاجة هبلة بالقيها بتضحك معايا مش عليا
حد معايا فى كل وقت
من اقرب اقرب الناس لقلبى بجد
يمكن ان دخلت السن عشان اقابلها مش عشان مستقبلى
بحس بكده علطول
بحس انها نعمة من عند ربنا
اصل الواحد لما يلاقى حد بيحبه كده وفهمه كده وبيعيش معاك فى اوقاتك الوحشة قبل الحلوة
يبقى لازم تبقى نعمة
كل سنة وانتى طيبة يا جميل
انتى هتفضلى طول عمرط طفلة بقلبك ده
مش عارف اقولك بحبك اد ايه
بس كل اللى اقدر اقوله يارب يجمعنا فى الجنة مع بعض
واسيب الدنيا قبلك
كل سنة وانتى طيبة يا قمراية

romansy يقول...

كل سنه وانتى طيبه

انتى كده هتكلفينى جامد وتكلفى كل اللى هيزورك
كده انتى هتخدى عيديه
وكمان هديه عيد الميلاد
وكمان هديه النجاح

انتى هتعملى ازمه اقتصاديه فى المدونات



يلا بقى ان شاء الله ما حد حوش

كل سنه وانتى طيبه علشان عيد الاضحى

ودى العيديه
http://www.freefoto.com/images/04/28/04_28_50---US-Dollar-Bills_web.jpg


كل سنه وانتى طيبه علشان عيد ميلادك

ودى الهديه
http://www.spiegel.com/assets/product_images/view_large/SP05S0632b.jpg


الف مبروك دى علشان الدبلومه

ودى الهديه
http://www.tithkar.com/gallery2/main.php?g2_itemId=334

Purplewaves يقول...

رومنسي
كل سنة وإنت طيب وعيد سعيد عليك يارب ووصلت التهنئتين كاملين العدد :)))



تحياتي

Purplewaves يقول...

Dr.Hamas
كل عام وانت طيب وكلنا إلى الله أقرب وأدوم على طاعته، ويارب يديم المحبة بيني وبين برينسيس في الله وبين كل الأصدقاء

كل سنة وإنت طيب ، وأكيد انت اكبر مقام وده تواضع منك وربنا يرضى عنا جميعا

تحياتي

عاشقة القمر يقول...

Hكل سنه وانتي طيبه لعيد وعيد ميلاد

يارب تحقق سنه جاي عايزه

علي فكرها انا اكبر منيك بكثير يعني خلاص عجزت هههههههههههههه27 سنه

mohamed ghalia يقول...

كل سنة وانتى طيبة بمناسبة عيد الأضحى
كل سنة وانتى طيبة بمناسبة عيد ميلادك
ربنا يباركلك فى عمرك ويسعدك دايما
فى حفظ الرحمن

Purplewaves يقول...

برينسيس
صديقتي الصدوقة، مهما قلت من كلام بجد مش هيوفيكي حقك عليا ربنا يخليكي ليا ويجمعنا في الجنة اللهم آمين



تحياتي

Purplewaves يقول...

رومنسي
كل سنة وإنت طيب ومش عارفه اقولك ايه بصراحة انا كده فعلا هعمل ازمة اقتصادية في المدونات والدنيا هتتقلب عليا 3 هدايا مرة واحدة لا ده كتير كتير كتير (وش مكسوف)

كل سنة وانت طيب ومرسي بجد على ذوقك


تحياتي

Purplewaves يقول...

عاشقة القمر
كل سنة وإنتي كمان طيبة يا جميلة وعيد ميلاد سعيد عليكي وبعدين مين اللي كبيرة دي، ده انتي في عز شبابك يا جميلة، ربنا يباركلك في عمرك يارب ويسعدك



تحياتي

Purplewaves يقول...

mohamad ghalia
كل سنة وإنت طيب وربنا يباركلك في كل أيامك ويجعلها سعادة دايمة ان شاء الله




تحياتي

Kiara يقول...

القمر هنا

كل سنه وانتي طيبه بمناسبه العيد

وكل سنه وانتي طيبه بمناسبه عيد ميلاااااادك

كل سنه وانتي من ربك قريبه

كل سنه وانتي من الناس محبوبه

كل سنه وانتي احلي بنوته

وربنا يرزقكك الزوج الصالح

blue-wave يقول...

كل سنه وانتى طيبه وبالف خير

عاشقة القمر يقول...

عارفه امس كنت عايزه رغي
كثير بس تقول ايه عدنا وقت نوم محدد تقولي ورانا مدراسه ههههههههههههههههههه





عارفه انا كل بذكر ناس كلهم بعيد ميلادهم
بتصال بيهم
قريبنا لي بعث لهم هديه
ام انا يوم عيد ميلادي مفيش احد بذكرني شكراااااااااااااااا ليك انيك ذكرتني
والله فرحت من قلبي
انا مش بعمل عيد ميلاد خالص

اه عن برنيس والله بنت دي عسل ربنا يكرمها اعطيها ولد الحلال


والله انا طلبت منها طلب عشان ماجستر عندي نفذوت علي طول مش عارفه رود لها زي
يارب تفضل علي طول مع بعض


علي فكرها انا مش عارفه اكتب عن ميلادي في مدونتي كان نفسي نزل حاجات جميل بس مش عارفهالجهاز مالو مش بنزل الصوار
اهو انتي مادام فتكرتني خالص


شكرا ليك يا قمر

م/ الحسيني لزومي يقول...

تقبل الله منا ومنكم
وكل عام وانتم بخير

الازهرى يقول...

صديقتى العزيزة

كل سنةوانت بالف خير وسلام
وعقبال سبعة وسبعين سنة طاعة لله ومحبة للاصدقاء وعطاء للوطن

انحنى احتراما لتلك الصداقة الرائعة ادامها الله تعالى عليكم

وعيد ميلاد سعيد

mahasen saber يقول...

كل سنه وانتى طيبه وبالف خير
بس مش مهم طول العمر او قصره المهم هنعمل فيه ايه ينفعنا فى دار الفناء

عيد سعيد عليكى يا جميله
ربنا يباركلك فى عمرك

رئـــــيسـة حزب الأحلام يقول...

كل سنة وانتى طيبة
ماشاء الله عيد ميلادك وعيد الاضحى
حاجة جميلة
ياربدايما فى افراح وسعادة
تحياتى لكى

فارس بلا جواد يقول...

كل سنة وانتي طيبة بمناسبة عيد الاضحي وعيد ميلادك
صدفة جميلة انهم يجوا مع بعض
ان شاء الله السنة الجديدة تكون كلها خير وسعادة عليكي

Purplewaves يقول...

مولان
وإنتي طيبة يا قمر وكل سنة وكلنا سعدا ومحققين كل أحلامنا



تحياتي

Purplewaves يقول...

بلو ويف
كل سنة وانت طيب وعيد سعيد عليك



تحياتي

Purplewaves يقول...

عاشقة القمر
إنتي ترغي زي ما انتي عايزه ووقت ما انتي عايزه المدونة كلها تحت أمرك وكل سنة وانتي طيبة يا جميلة





تحياتي

Purplewaves يقول...

م/الحسيني
تقبل الله منا ومنكم



تحياتي

Purplewaves يقول...

الأزهري
كل عام وأنت بخير ، وشكرا على كلامك الرائع وعيد أضحى سعيد


تحياتي

اقصوصه يقول...

كل عام وانتم بخير :)

Purplewaves يقول...

محاسن
وإنتي طيبة وعيد سعيد عليكي واكيد طبعا الاهم من طول العمر العمل الصالح اللي ينفعنا وينفع الناس



تحياتي

Purplewaves يقول...

رئيسة حزب الأحلام
وانتي طيبة وعيد سعيد ويارب دايما حياتنا كلنا كلها اعياد وافراح




تحياتي

Purplewaves يقول...

فارس بلا جواد

كل سنة وإنت طيب وعيد سعيد


تحياتي

Purplewaves يقول...

أقصوصة

عيد سعيد :))


تحياتي

حنين.. يقول...

كل سنه وانتى طيبه يا قمر با لعيد
وبعيد ميلادك
وعجبنى فيكى وى
انك بتحاسبى نفسك اول با ول
مش كله على بعضه زى حالاتى
انا عيد ميلادى بعد شهر
منكده على نفسى من سنه
هههههههههههههه
دمتى سالمه
حنين

ولد مصري يقول...

الواحد مش عارف يبتدي بأنهي مناسبة

اولا كل سنه وانتي طسيبة بمناسبة العيد وبعدين كمان كل سنه وانتي كيبة بمناسبة العيد برضه اللي هو عيد الميلاد واخيرا الف مبروك بمناسبة الدبلومة

يا ترى التورتة لسه فاضل فيها حاجة ولا الله يرحمها كانت لذيذة؟

تحياتي

شفـقــة و إحســــان يقول...

كل سنة وانتى طيبة مرتين

Gannah يقول...

كل سنة وانتى طيبة يا بربل
لكل المناسبات
انتى مش متصورة انك عشتى 22 سنة امال انا اعمل ايه؟؟
اروح اعيش فى متحف ولا ايه؟؟
انت لسه صغنونة وامورة
تحياتى

غير معرف يقول...

What's Happening everyone, prime picture! love it - from michael who hates [URL=http://free-sim-cards.org.uk]free sim cards[/URL]